Porojeke e e kopanetsweng ya go tsadisa dipodi tsanaga e gatela pele

Porojeke e e kopanetsweng ya go tsadisa dipodi tsa naga, e e simolotseng ka Motsheganong 2024 kwa bogosing jwa Barolong Boo Seleka kwa Thaba’Nchu, ka fa botlhaba jwa Bloemfontein kwa Foreisetata, e bontsha kgolo e e nonofileng ka dipotsane di le lesome le borobongwe (diphelehu di le lesome dinku di le robonngwe tse di namagadi) tse di ileng tsa tsalwa fa e sale ka nako eo. Letsomane la ntlha la dipodi tsa naga tsa Ba-Nguni tse 21 (dinku tse di namagadi di le masomeamabedi le phelehu e le nngwe) jaanong di oketsegile go nna tse masomeamane. Go tsalwa ga 95% ya dipotsane mo setlheng seno ke tshupo e nngwe ya Katlego ga dipororeke tse di kopantsweng tsa tlhabololo ya temothuo e e dirwang ke kantoro ya ga Kgosi Gaboilelwe Moroka ka go dirisana mmogo le AfriForum le bana-le-seabe ba bangwe ba tlhagiso-dikumo tsa temothuo fa e sa le ka 2020 kwa lefelong la Thaba’Nchu.

Maikaelelo a porojeke eno ya go tsadisa dipotsane ke go tlhomelela balemirui ba ba nang le dikgwebo tse dinnye ba selegae ka kitso le dikgono tsa go tlhama kgwebopotlana ya temothuo ya go itshedisa go nna dikgwebo tse di nang le poelo le go nna le marole a dipodi a kwa bofelong a tlileng go nna dipodi tsa polase e e kgonang go itsetsepela dipolase le go tsadisa dipodi gore go tlhamiwe diporojeke go ya pele tsa balemi b aba santseng ba fatlhoga.

“Porojeke eno ya go tsadisa dipodi ke nngwe ya diporojeke di le mmalwa tsa temothuo, tse di bopang karolo ya leano la rona la go aga naga setšhaba se se kgonang go itlamela, se se nang le kagiso, se se tlhomameng, se se sireletsegileng le se se kgonang go itsetsepela. Pabalesego ya dijo e na le seabe sa botlhokwa mo go fitlheleleng maikaelelo ano mme ka jalo go botlhokwa go rotloetsa temothuo ka mokgwa o o akanyetsang mokgwa otlhe wa tlhagiso-dikuno. Go botlhokwa mo go nna jaaka moeteledipele go netefatsa gore Barolong Boo Seleka ba kgona go itlhokomela mme mokgwa ono wa go kgona go itlhokomela o tshwanetse go rotloediwa gongwe le gongwe. Bontsi jwa dikgwetlho tse re lebaneng le tsone, jaaka bokebekwa jo bo kwa godimo, lehuma, tlala, phepelotlase le botlhokatiro, di ka rarabololwa ka mokgwa ono. Re tshwanetse go thusa puso go tlisa ditharabololo, re lemoga gore go tla tsaya nako, mme se se botlhokwa ke go nna ba ntlha pele go tsaya kgato le go tsenya thulaganyo eno mo tirisong. Gape re tshwanetse go rotloetsa baagi, segolobogolo basha, mme ke itumelela gore mo ngwageng o o tlang, re tla bo re tsamaya motse le motse go ruta batho ba one bokgoni jono, jo bo tla akaretsang go tokafadiwa ga dijini tsa dipodi tsa mo nageng ya rona. Maikaelelo ke go tsenya leano leno mo tirisong mo dingwageng tse tharo tse di tlang, se se rayang gore re tla bo re akareditse metsana yotlhe ya Thaba’Nchu. Re leboga balekane botlhe ba rona mo loetong lono, re lebogela tshegetso ya bone. E kete Modimo wa rona yo o ikanyegang a ka tswelela go segofatsa loeto lono”, KgosiGaboilelwe Moroka, moeteledipele wa morafe wa Barolong Boo Seleka kwa Thaba’Nchu.

“Go atlega ga porojeke eno go a re itumedisa. Gone ke boammaaruri gore go na le dilo di le mmalwa tse di dirang gore porojeke e gole – selo se segolo se se dirang jalo ke tsela e porojeke eno e tsewang ka yone le maiteko a go e dira gore e tswelele pele le go nna le matswela. Ke tshiamelo mo go AfriForum go tshegetsa Kgosi Moroka le morafe wa gagwe go fitlhelela boikaelelo jwa bone jwa go kgona go itlamela mme ka jalo ba kgone go umakiwa fa go buiwa ka Katlego e e nileng gone”, ga rialo Nantes Kelder, e leng Mookamedi wa Bosetšhaba wa Porojeke: wa Dikamano le Tirisanommogo fa Gare ga Ditso Tse di Farologaneng.

“Saai e lebogela tšhono ya go nna le seabe mo go tshegetseng balemirui ba bannye mo maitekong a bone a go tokafatsa tiro ya bone ya go gweba ka maruo a bone “, go rialo Leon Lourens, Mookamedi wa Tlhabololo kwa Saai, mongwe wa batsayakarolo mo porojekeng.

“Diporojeke tse di kopanetsweng jaaka eno, tse di direlwang gore baagi ba solegelwe molemo, ke matswela a AfriForum e nnileng le one, le Maaforikanere ka kakaretso ka ntlha ya go tlhopha ga bone le go dira maiteko a go tshedisana ka kagiso le ka tshiamo le ditšhaba tse dingwe tsa setso mono mo Aforika Borwa. Go simolola go nna le tsamaiso e ntšha ya loago, e e theilweng mo pusoselegaeng ya setšhaba, jaaka fa re ntse re atlega go tlhama mokgwa wa go gokagana mmogo ga maloko a ditšhaba tsa setso mo gare ga baagi ba maemo a a kwa tase. Mo mokgweng ono wa go kgona go gokagana mmogo ga bone, re a tshegetsana go tlhomamisa gore bana botlhe ba baagi ba setso ba nne le bokamoso jo bo itumedisang mono mo nageng ya rona”, go bolela jalo Barend Uys, Tlhogo ya Dikamano Tsa Ditso Tse di Farologaneng le Tirisanommogo kwa AfriForum.”

Porojeke eno e e kopanetsweng ya go tsadisa diruiwa ke e nngwe ya diporojeke di le mmalwa tsa temothuo le ngwao-boswa tse di nnang teng ka ntlha ya tumalano ya kamogelano le tirisanommogo e e neng ya konelwa ka 2022 magareng ga AfriForum le Barolong Boo Seleka.